TVRI YOGYAKARTA NEWS – HENDRY
Wit kepel mujudaken satunggaling taneman langka ing indonesia. Sanajan dados ciri mirunggan utawi flora identitas DIY, nanging mboten kathah dipun prangguli ing sadengah laladan.
Daerah Istimewa Yogyakarta gadhah taneman mligi, ingkang dados flora identitas, inggih menika kepel. Duk jaman kawuri, wit ingkang wohipun arum lan legi menika tuwuh ing nglebet ndalem kraton. Para putri dalem remen dhahar woh kepel, jalaran mupangat menggahing sarira njalari ganda arum ing raga. Woh kepel ingkang memper sawo menika medal nempel ing sakupenging wit, saking ngandhap dumugi nginggil, nalika mentah, keliripun soklat, lajeng ewah dados klawu menawi sampun wancinipun ngundhuh. Salah satunggaling jinis taneman woh-wohan saking famili anonasea kanthi nama ilmiah steleko karpus burahol menika saged tuwuh kanthi sae ing siti kang subur. Witipun silindris utawi piramid, lencir ngantos dasanan meter inggilipun, pangipun kathah lan thukul kanthi racak, saengga ketingal elok, mila laras ugi minangka taneman rerenggan ing pekawisan. Emanipun, budidaya wit kepel namung saged dipun dheher wijinipun saking uwoh ingkang mateng kemawon. Nate dipun cobi mawi cara setek lan cangkok, nanging dereng kasil. Sanajan mujudaken flora identitas DIY, nanging mboten ing sadengah laladan saged dipun prangguli, jalaran mboten kathah warganing masyarakat DIY menapadene ing pekawisan kantor pamarintah dipun tanemi wit menika, kepel pinitados gadhah nilai filosofi adhiluhung inggih menika mralambanganken manunggaling sedya kaliyan gegayuhan.
