TVRI YOGYAKARTA NEWS – HENDRY
Cupang mujudakan salah setunggaling jinis ulam hias ingkang ing wekdal sakmenika kathah dipun remeni ngakathah. Bab menika ndadosaken kalodangan usaha budidaya ulam cupang sae.
Ulam cupang utawi beta kaloka minagka ulam ingkang agresif. Ananging ulam menika nggadahi bentuk lan werni ingkang endah lan saged ndudut kawigatosan sinten kemawon jalaran cakrik badan menapadene siripipun ingkang manekawerni, sarta ebahing ulam ingkang anteng. Inggih bab menika ingkang ndamel ulam cupang kathah dipun budidaya dening ngakathah. Kawontenan menika ugi ndadosaken kalodangan usaha sesadeyan ulam cupang sae. Kados ingkang dipun tindaaken dening Wisnu setunggaling warga Dusun Kalipucang Bangunjiwo Bantul. Mila bikanipun inggih namung nyobi kemawon ananging kanyata kathah warga ingkang lajeng ndatengi papanipun menika. Sedaya jinis ulam cupang ingkang wonteni ng griyanipun menika dipun budidaya piyambak saking manekawerni jinis. Piyambakipun ugi asring nyobi ngilangaken ulam cupang ingkang benten jinisipun kanthi pangajab saged ngasilaken ulam cupang ingkang nggadahi werni ingkang langkung sae lan nyleneh. Langkung tandes piyambakipun mratelaaken bilih bab wigati ing saklebeting nindaaken budidaya ulam cupang inggih menika nalika anakan cupang nembe lair dumugi umur kalih minggu. Ing umuran menika ulam cupang gampil sanget pejah, nalik amboten dipun rimat kanthi estu. Salah setunggalipun bab ingkang dipungatosaken inggih menika pakan. Pakan ingkang dipun ginaaken inggih menika artemia utawi anakan urang. Pakan menika smapun kathah sumadya ing kios ulam hias. Bab sanes ingkang kedah dipungatosaken ugi inggih menika ngawekani jamur lan sesakit ing aquarium ingkang saged dipun awekani migunaaken obat anti jamur utawi ngginaaken ron ketapang. Obat anti jamur semangkeh menika badhe nuwuhaken werni biru ing toya budidya cupang, sawetawis menawi ngginaaken ron ketapang werninipun toya dados radi buket. Ananging bab menika taksih aman mboten ngreridu tuwuhing ulam cupang. Ulam cupang ingkang dipun budidaya menika dipun sade wiwit regi 30 dumugi 300 ewu rupiah. Awis lan mbotenipun ulam cupang menika dipun temtoaken saking werninipun, werni ingkang tansayanyleneh lan arang dipun prangguli badhe ndamel regi ulam cupang awis. Mila mboten maiben bilih pengaosipun ulam cupang menika saged ngancik yutan rupiah.
