TVRI YOGYAKARTA NEWS – WIDI-YUDHA
Para pamirsa, ing saklebeting syiar agami islam ing Ngayogyakarta, kathah tilaran sujarah minagka srana kangge nyebar dakwah islam. Salah setunggalipun inggih menika Masjid Jami Nanggulan ingkang dipun bangun ing abad kaping pitulas.
Masjid Jami Nanggulan dumunung ing Dhusun Jatingran Kidul, Jatisarono, Nanggulan Kulonprogo. Sujarah madheging masjid amenika kirang dipun mangertosi, jalaran sekdhikipun sujarah ingkang dipun tilaraken. Ananging ingkang mesthi mesjid menika mujudaken setunggaling mesjid ingkang dipun bangun dening pihak Kraton Ngayogyakarta. Miturut katrangan para kasepuhan Masjid Jami Nanggulan madheg ing purwakaning pamarintahan ing Sri Sultan Hamengku Buwono ingkag kaping kalih. Rikala tahun 1790 dipun bangun sekawan masjid pathok negara, sasampunipun mesjid kasebat ampun madheg, saklajengipun dipun bangun sawetawis mesjid ing sawetawis laladan kalebet ing laladan Nanggulan menika. Cakrik bangunan mesjid jami nanggulan sampun nemahi ewah-ewahan wiwit saking jerambahipun ingkang sampun dipun gantos mawi marmer. Mekaten ugi perangan serambi mesjid jumbuh kaliyan wekdal ugi sampun dipun ewahi saking cakrik aslinipun. Sawenah takmir masjid Jamhari mratelaken rikala dipun mulyaaken ing perangan serambi tuwuh perkawis ingkang setuju lan mboten setuju, amnaging kasil dipun sarujuiki dipun bangun ananging mboten ngewahi cakrik bangunan lami. Perangan mesjid inkang tetep kajagi aslinipun inggih menika senthong utami kanthi cakrik joglo. Sekawan saka guru ingkang wonten dipun sangga ompak ingkang dipun tutup mawi sela marmer. Menawi senthong utami korinipun rumiyinipun namung wonten setunggal, sakmenika dipun damel cacah tiga kanthi cakrik modern. Mustaka mesjid tetep dipun jagi kadosdene mesjid kraton umumipun inggih menika wontenipun gada rinengga ron kluwih. Ing siring kidul mesjid wonten pasareyan umum ingkang ugi dipun sarek-aken emban kraton kinasih. Saking sakkathahing srana mesjid, wonten kalih pirantos arupi mimbar lan bedhug ingkang asal usulipun mboten dipun mangertosi, wiwit dipun bangun Masjid Jami Nanggulan kajawi minagka papan kangge mucalaken ngilmi agami ugi dipun mupangatken warga masyarakat kangge papan pepanggihan lan punjering krida keumatan mliginipun mental kerokhanian. Saking sak kathahing tradisi agami ingkang dumugi wekdal samenika dipun jagi adzan Jumat, ingkang katindaken gangsal tiyang kanthi sesarengan. Dumugining wekdal samenika warga masyarakat mboten wantun ngewahi tradisi menika.
