TVRI YOGYAKARTA NEWS-JATMIKO HADI
Mlebet ing mangsa pancaroba menika, hektaran lahan olah tetanenipun kadang tani ing laladan Kabupaten Kulonprogo wiwit kekirangan toya. Kangge nyekapi kabetahan toya irigasi kadang tani mupangataken mesin kompa toya kangge nginggahaken toya sumur.
Mlebet ing purwakaning mangsa ketiga menika, 5 hektar lahan taneman pantun ing Bulak Silir Agung Karang Sewu Galur Kulonprogo kekirangan toya. Bab menika amargi pasudiyan toya irigasi ing wewengkon menika sampun winates. Salah saweneh kadang tani agus hidayat ngandaraken, kangge nyekapi kabetahan toya ing saklebeting ngolah lahanipun, kadang tani kedah ngedalaken beya tambahan engga 25 ewu rupiyah kangge tumbas BBM mesin kompa toya. Kompa toya menika dipun ghinakaken kangge nginggahaken toya sumur ingkang dipun damel warga ing pesabinan. Menawi mboten dipun lebi, taneman pantun ingkang nembe umur 10 dinten menika tuwuhipun mboten maksimal, kepara saget pejah.
Kawontenan kados menika ajeg dumados saben tahun, mliginipun menawi mlebet ing mangsa tanem kaping kalih. Kadang tani ngajab dumateng pamerintah lan bebadan ingkang kawogan, saget biyantu kadang tani ing saklebeting nyekapi kabetahan toya iriogasi ing mangsa ketiga.
