TVRI YOGYAKARTA NEWS-MUHAMMAD RIDWAN
Kabandingaken taneman sanesipun, taneman parijotho sampun awis – awis dipun prangguli ing saktengahing masyarakat, kamangka taneman menika gampil tuwuh. Kajawi dipun tanem ing lahan parijotho ugi saget dipun tanem ing media pot.
Salah setunggaling warga ingkang budidaya taneman parijotho inggih menika sumarno, warga Kalitengah Lor Kalurahann Glagaharjo Kapanewon Cangkringan Kabupaten Sleman. Piyambakipun nanem taneman parijotho ing pot plastik. Piyambakipun milih nanem parijotho amargi pangrimatanipuningkang gampil. Supados saget tuwuh kanthi subur, panyiramaning toya tansah dipun tindakaken kanthion ajeg wanci injing lan sonten. Sawetawis kangge kacekapan rabukipun, piyambakipun mupangataken rabuk organik saking bucalan menda menapa dene lembu. Taneman parijotho piyambak gadahi cawang lan wohipun werni ungu. Sawetawis panjangipun taneman menika ngancik 40 dumugi 50 sentimeter. Taneman ingkang mujudaken taneman khasipun saking laladan kabupaten sleman menika, ugi gadahi sawetawis mupangat tumrap kasaran, salah setunggalipun kangge nyuburaken rahimipun para pawestri.
Laladan Padukuhan Kalitengah Lor Kalurahann Glagaharjo Kapanewon Cangkringan Kabupaten Sleman menika trep sanget dipun dadosaken papan kangge budidaya taneman parijotho, awit hawa nipun ingkang asrep lan mapan ing sak ngandhapipun redi merapi.
