TVRI YOGYAKARTA NEWS – JATMIKO HADI
Kajawi minangka tontonan kangge masyarakat, satunggaling beksan menika ugi wonten ingkang mujudaken jejangkeping setunggaling ritual. Antawisipun inggih menika beksan gambyong lan tayub ingkang mujudaken pralambang kasuburan lan kamakmuran.
Kados mekaten menika beksan gambyong ingkang dipun segahaken ing adicara merti desa luwaran ingkang dipun adani ing Dusun Taruban Kalurahan Tuksono Kapanewon Sentolo Kulonprogo. Beksan ingkang dipun paragakaken dining para pawestri menika, mujudaken salah setunggaling jejangkep ingkang kedah wonten ing adicara merti dusun luwaran menika. Beksan gambyong padatanipun dipun segahaken ing adicara pambuka kangge nyugata para tamu ingkang rawuh. Kajawi beksan gambyong, wonten ugi beksan tayub ingkang ugi dipun segahaken ing adicara merti desa menika. Bentenipun beksan tayub mekaten dipun pentasken ing pungkasaning acara. Beksan gambyong lan tayub piyambak mboten namung mujudaken tontonan tumrap para rauwh, ananging ugi ngemu setunggaling simbol dewi sri ingkang mujudaken dewi kasuburan lan kamakmuran. Werni ijem lan jene ing rasukanipun para pambeksa menika, ugi mujudaken pralambang kamakmuran lan kasuburuban. Sak sampunipun pagelaran beksan tayub lan gambyong menika, ing dinten candakipun adicara merti desa dipun pungkasi kanthi kirab budaya lan kenduri ingkang dipun sartani dining sedaya warga masyarakat.
