TVRI YOGYAKARTA NEWS – JATMIKO HADI
Jawah ingkang sampun mboten mandhap ing sawetawis wekdal menika, ndayani watawis 5 hektar lahan pesabinan ing laladan kapanewon temon kabupaten kulonprogo kekirangan toya irigasi. Menawi mboten enggal – enggal dipun awekani, kadang tani saget nemahi gagal panen.
Salah saweneh among tani saking laladan Dusun Dukuh, Kalurahan Sindutan, Temon, Kulonprogo, supartono nedahakaen, bilih sampun sawetawis minggu menika lahan olah tetanenipun kekirangan toya irigasi awit jawah ingkang sampun mboten dawah ing laladan menika. Kangge ngawekani supados olah tetanenipun saget gesang kanthi sae, piyambakipun kedah mupangataken mesin kompa disel kangge nginggahaken toya saking lepen. Bab menika temtunipun ndamel beya pangrimatanipun ugi langkung katah, menapa malih anggenipun ngocori lahan olah tetanenipun menika katindakaken tigang dinten sepindah supados taneman mboten pejah. Ing saklebeting nginggahaken toya menika, mbetahaken bbm ngancik tiga setengah liter, kangge wekdal 6 jam. Kajawi perkawis winatesing toya irigasi, piyambakipun ugi kedah ngadepi katahipun suket ingkang tuwuh ing saktengahing taneman pantunipun. Menawi mboten dipun resiki, suket menika saget ndamel taneman pantunipun pejah lan nemahi gagal panen.
Ing laladan kalurahan sindutan menika wonten udakawis 5 hektar lahan olah tetanenipun kadang tani ingkang kekirangan toya irigasi. Kadang tani namung saget pasrah lan kapeksa kedah ngedalaken beya tambahan kangge milujengaken tanemanipun.
