TVRI YOGYAKARTA NEWS – ADI NUGROHO – WENDY
Laladan pesisir Bantul mujudaken salah setunggaling papan ingkang kawentar minangka punjering olah tetanen brambet, mila mboten maiben kathah taneman brambet ingkang saged dipun prangguli ing laladan menikasalah setunggalipun varietas merdeka.
Ing wekdal sakmenika katah kadang tani ingkang nindaaken budidaya taneman brambet sae menika brambet bauti menapadene brambet varietas sanesipun, nanging kanyata wonten setunggal malih brambet ungggulan kadang tani gesik bantul inggih menika brambet varietas merdeka. Salah setunggaling laladan ingkang kawentar minangka punjering taneman brambet bima inngih menika ing laladan Sri Gading Pesisir Bantul. Kados ingkang dipun tindaaken dening Joko, saweneh kadang tani brambet varietas merdeka. Taneman brambet jinis unggul ingkang dipun tanem menika ketingal sae. Menawi dipun tingali taneman brambet ingkang dipun budidaya menika kawontenanipun ronipun ugi subur. Saged kawuningan, taneman brambet menika pancen cocok sanget dipun budidaya wonten ing laladan ingkang hawanipun benter. Mila mboten maiben bilih mlebet ing mangsa ketiga kathah kadang tani ing laladan menika ingkang sami nindaaken budidaya taneman brambet. Rahayunipun kawontenan cuaca ing papan menika sampun mboten kathah jawah malih mboten kados sawetawis wekdal kapengker ingkang saged ndayani taneman brambet pejah. kangge nyekapi kabetahan toya, Joko ajeg nyirami taneman brambet saben dintenipun migunaaken sumur bor ingkang ngginaaken tenaga listrik ingkang langkung mirah kapandingaken kaliyan bensin. Anggenipun nyirami taneman brambet menika ugi katindaaken sesarengan kaliyan taneman sanesipun ingkang dipuntanem wonten ing sakiwa tengening lahan brambet menika. Piyambakipun ngajab semangke asilipun sae lan reginipun inggil. dumugi wedal sakmenika, ama sesakit ingkang ngrebasa ugi tasih winates, salah setunggalipun inggih menika kawontenan winih ingkang tuwuhipoun muser jalaran winih ingkang kirang sae. Brambet merdeka pancen kapetang langlung kiyat ngajengi ama lan asil brambetipun ugi ageng-ageng. Mboten namung menika, brambet varietas merdeka ugi saged dipun simpen ing salebeting wedal ingkang dangu kanti catetan kawontenan brambet kedah garing lan dipun papanaken ing papan ingkang wonten sirkulasi udaranipun.
