TVRI YOGYAKARTA NEWS – WIDI – HARIF YUDA
Sinaosa sampun ing jaman sarwa muka, ewasementen kerajinan kipas saking deling tasih kathah dipun remeni sutresnanipun. Kerajinan menika kathah dipun mupangatken kangge kenangan dhumateng tamu ing acara-acara tinamtu kadosta palakrama.
Usaha ndamel kerajinan kipas saking deling ingkang dipun tindaken dening ngadiyanto, saking padusunan jipangan, bangun jiwa kasihan bantul menika kawiwitan tahun kalih ewu tiga. Piyambakipun nggegulang ing donyaning kerajinan menika sasampunipun piyambakipun lulusa saking pawiyatan. Benten kaliyan wiranem sanesipun, sasampunipun lulus pados lapangan pakaryan, ananging ngadiyanto kepara gadhah kekajengan ndamel lapangan pakaryan piyambak. Nguningani bilih ing laladan jipangan menika saperangan ageng, warganipun sami nggegulang ing usaha kerajinan ndamel kipas deling, saklajengipun piyambaikipun ugi ndamel kerajinan menika. asilipun kanyata ugi sae, asiling kerajinan ugi pajeng lan sampun kakintun ing kitha kitha ing laladan pulo jawi kepara dumugi sak jawining rangkah pulo jawi. Bahan baken ingkang dipun ginaken inggih menika arupi deling wulung, ingkang dipun irat kanthi mirunggan, saklajengipun dipun sukani cita. Pengaosing kipas menika saking sewu gangsal atus rupiyah dumugi gangsal ewu rupiyah gumantung kaliyan ukuranipun.
Dipun tambahaken dening ngadiyanto, bilih saben minggunipun sekedhikipun saged ndamel gansgal ewunan kipas. Menawi wonten pesenan kathah piyambakipun nindaaken memitran kaliyan tangga tepalihipun. Ing padusunan jipangan piyambak, wekdal sakmenika wonten tigang dasaan kepala somah ingkang makarya ndamel kerajinan arupi kipas deling.
