TVRI YOGYAKARTA NEWS – SETYA BUDI
Kapangaribawa jawah ingkang mandhap sawetawis wekdal kapengker, taneman brambet gadahanipun kadang tani ing Karangrejek, Wonosari, Gunungkidul, kawontenanipun risak. Katah taneman brambet ingkang langas utawi garing saengga ngedhakaken produksi brambet ing laladan menika.
Sampun sawetawis dinten menika sawetawis kadng tani brambet ing laladan karangrejek wonosari sambat, awit kawontenan taneman brambetipun ingkang sami risak. Bab menika dipun jalari awit jawah deres ingkang dumados sawetawis dinten pungksan. Jawah ndamel taneman brambet sami langas utawi garing, lan mboten saget dipun trenggalani mawi cara menapakemawon kalebet obat. Langas mangaribawani tuwuhing brambet dados kirang maksimal, saengga umbi ingkang dipun asilaken ugi kirang sae. Salah saweneh kadang tani brambet ing laladan menika Supriyanto atur panyaruwe, kajawi taneman brambet sami langas, budidaya brambet ingkang dipun tindakaken dining kadang tani menika ugi katerak ama uler. Kawontenan saya awrat amargi kawontenan siti lahan olah tetanen ugi risak amargi kenging toya jawah. Kanthi kawontenan menika piyambakipun ngandaraken, bilih asil panen brambet badhe mandhap kabandingaken ing mangsa panen padatan.
Supriyanto lan kadang tani brambet ing laladan karangrejek menika namung saget ngajab pamerintah paring bebanton kangge nrenggalani kawontenan menika, amargi beya kangge pangrimatan lan bangsulaken taneman brambet betahaken beya ingkang katah.
