TVRI YOGYAKARTA NEWS – ADI NUGROHO – WENDY
Asil panen ingkang sae mboten saged uwal saking perkawis kados pundi kadang tani ngrimat tanemannipun sarta milih winih ingkang pinunjul. Semanten ugi tumrap tiyang ingkang mbudidaya buncis. Winih hibrida genjah kanyata asilipun langkung kathah lan kiyat ngajengi ama sesakit.
Kados mekaten menika kawontenan ipun kebon buncis gadhahanipun mujiyanto warga Bantul. Mboten kathah ingkang mangertosi bilih buncis menika mujudaken setunggaling taneman janganan ingkang saged dipun mupangataken ron lan woh-ipun. Mujiyanto ngandaraken supados asilipun panenan saget sae wonten perkawis ingkang kedah dipun pigatosaken. Sepisanan winih buncis ingkang badhe dipun tanem kedah dipun pilih ingkang sae, inggih menika ingkang asal-usulipun gen cetha, werninipun winih ugi resik, mboten kisut lan mboten bolong. Meniko nedahaken bilih winih kala wau winih ingkang saras. Winih menika mirunggan sanget amargi saged nemtoaken tuwuhipun taneman ing mangkenipun. Winih ingkang sae ugi badhe nggampilaken kadang tani anggenipun ngrimat taneman. Asilipun panen ugi badhe sae, saya malih ing mangsa rendeng ingkang kathah mbeta ama sesakit tumrapipun taneman komoditas olah tetanen,. Langkung tandes malih Mujiyanto ngandaraken taneman buncis mbetahaken sunaring surya ingkang kathah kanthi intensitas jawah ingkang cekap. Buncis ugi ringkih sanget kaliyan toya ingkang ngembeng, pramila babagan menika kedah dipun pigatosaken kanthi estu.
Lan amargi buncis mekaten tuwuh kanthi marambat pramila betah lanjaran. Buncis saged dipun panen sasampunipun umur kawan dasa gangsaldinten sasampunipun dipun tanem. Woh buncis ingkang siyaga dipun panen inggih ingkang werninipun resik lan gilig. Panenan saged dipun tindaaken saben kalih dinten sepindhah. Saged kawuningan, taneman buncis mekaten saged dipun panen dumugi kaping kalih dasa ing setunggal mangsa tanem. Ama ingkang kedah dipun pigatosaken ing antawisipun kutu ingkang saged ngrisak perangan ron, kangge ngawekani ama menika cekap dipun semprot biopestisida.
