TVRI YOGYAKARTA NEWS – WIDI-HARIF YUDA
Para pamirsa, supados gadhah raos handarbeni dhumateng warisan budaya arupi bathik, masyarakat kedah saged mbentenaken batik asli kaliyan cita printing motif batik.
Dumugining wekdal samenika tasih kathah warganing masyarakat ingkang kirang mangertosi bentenipun antaiwsipun batik asli lan cita motif batik utawi ingkang asring sinebat printing. Ali subkan saweneh pengrajin batik saking Segajih, Hargotoirto, Kokap, Kulonprogo mratelaken bilih setunggaling cita kawastanan batik menawi ing saklebeting ndamel nglangkungi setunggaling proses inggih menika nyukani malam. Ali subkan ugi nelaken bilih, bathik asli saged dipun pirsani saking motif ingkang wonten ing selembar cita batik, padatanipun ing setunggaling batik asli mboten wonten motif ingkang sami persis, jalaran motif kasebat dipun damel ngginaken canting lumantar astanipun perajin. Kajawi menika menawi cita printing ing saklebeting cita gambaripun blawur, ingkang cetha namung ing perangan jawinipun kemawon mboten wolak-walik.
Kanthi mangertosi wau ing pangajab saged langkung nresnani, lan rumaos handarbeni saenhgga bathik mboten dipun akeni dening bangsa sanes. Ngengingi regi, cita batik asli ugi mboten awis sanget, gumantung kaliyan detail motifipun, saya kathah motif ingkang njlimet badhe saya awis pengaosipun. Awising regi wau jalaran ndamel bathik tulis mekaten mbetahaken wekdal ingkang dangu. Awit saking menika kanthi nggagem busana bathik asli temtunipun badhe suka pakurmatan dhumateng perajin bathik ingkang sampun ngetok sedaya kaprigelanipun ingkang kababar ing sak nginggiling lembaran cita.
