TVRI YOGYAKARTA NEWS – ADI NUGROHO-YUDHA
Tanamen okra pethak dumugi wedal samenika tasih dados kalodangan usaha ingkang sae. Nanging emanipun tasih kathah kadang tani ingkang dereng mangertosi cara budidaya okra pethak menapa dene pados pekenanipun.
Okra pethak dumugi wedal menika tasih kathah dipun padosi tiyang. Taneman menika pancen dereng kawentar ing indonesia kadosdene buncis, kacang panjang, terong lan sanesipun. Pekenan okra ugi tasih winates sanget namung ing kalanganing vegetarian menapa dene tiyang ingkang sampun tepang kaliyan taneman menika jalaran sampun nate ngulandara minangka tenaga karya ing manca negari. Ing Indonesia dereng kathah laladan ingkang mekaraken okra. Kamangka pekenan eksport okra mliginipun dhateng malaysia, singapura, jepang lan negari timur tengah tasih tinarbuka. Nanem okra mekaten kanyata ugi mboten njlimet. Namung kados nanem jagung menapa dene taneman hortikultura. Kepara kapandingaken kaliyan taneman janganan sanesipun, okra mboten mbetahaken rabuk ingkang linangkung. Ing umur kawan dasanan dinten taneman okra sampun saged sekar lan wiwit mawoh. Umur sedasa dinten dumugi kalih minggu woh okra alit menika sampun saged dipun panen lan dipun mangsak. Salah saweneh warga ing laladan Pojok Hargobinangun Pakem Sleman, ingkang sampun dangu mbudidaya taneman okra menika waleh, okra asil panen saking kebonipun menika kathah-kathahipun dipun sade ing Jakarta, sisanipun dipun sade ing supermarket ageng ing diy. Reginipun ugi mboten ajeg, wiwit saking wolulas ewu dumugi selangkung weu saben kilonipun. Kalodangan usaha taneman okra menika pancen tasih tinarbuka, ingkang kedah dipun tindhaken, ugi namung nepangaken taneman okra sarta mupangatipun okra kangge kasarasan sauger pekenan okra ugi lajeng tumut regeng.
