TVRI YOGYAKARTA NEWS – JATMIKO HADI
Wiwit dipun bikak ing tahun 2015 kapengker, lepen mudal sakmenika dados salah satunggaling papan wisata unggulan laladan Kabupaten Kulonprogo. Kajawi dados daya tarik tumrap para wisatawan, wontenipun wisata lepen mudal menika kanyata dados sumber ekonomi tumrap warga masyarakat ing sak kiwa tengenipun.
Mapan ing Dusun Banyunganti, Jatimulyo, Girimulyo, Kulonprogo, papan wisata lepen mudal mujudaken salah setunggaling papan wisata alam ingkang dumugining wekdal sakmenika tasih katah dipun datengi dining wisatawan. Wontenipun sumber toya ingkang bening inghkang dipun jamboraken kaliyan kaendahaning alam khas pareden, ndadosaken wisatawan betah ngendangi papan menika. Papan wisata kanthi wiyar setunggal setengah hektar menika, dipun klala dining warga masyarakat. Sinaosa mujudaken siti kaghunganipun pribadhi, ananging saben wulan asil saking panyadening girik lan parkir menika dipun bage antawisipun ingkang kagungan siti kaliyan panglola. Wontenipun papan wisata lepen mudal menika kanyata ugi mbikak lapangan pakaryan enggal dumateng warga masyarakat. Dumugining wekdal sakmenika wonten 40 warga masyarakat ing sak kiwa tenge papan menika ingkang dados panglola papan wisata lepen mudal. Kajawi makrya dados petugas tiket, parkir engga pemandu wisata, mboten sekedik warga ingkang mbikak wande kanthi nyade manekawerni daharan lan unjukan ing papan menika.
Ing saben dintenipun wisatawan ingkang ngendangi eko wisata lepen mudal ngancik atusan tiyang. Menapa malih menawi ngepasi dinten sabtu lan minggu utawi dinten preen sanesipun gunggunging wisatawan ingkang ngendangi papan menika ngancik sewu tiyang. Kajawi lelumban lan kekeceh, ing papan menika wisatawan ugi saget nindakaken manekawerni krida wiwit saking out bound engga camping utawi kemah.
