TVRI YOGYAKARTA NEWS – SETYA BUDI
Kadang tani janganan mliginipun jinis kacang panjang ing laladan Gedangsari Gunungkidul rumaos remen manahipun, amargi kajawi asil panen kacang panjang sae, pengaosing lan panyuwunan peken sakmenika inggil kabandingaken wekdal sakderengipun.
Ing mangsa panen kacang panjang sakmenika, kadang tani pikantuk bebathen ingkang langkung ageng kabandingaken mangsa panen sakderengipun. Salah saweneh kadang tani janganan ing laladan Bulak Wareng Kalurahan Ngalang Kapanewon Gedangsari Kabupaten Gunungkidul Marsudi ngandaraken, bilih pengaosing kacang panjang ing tataran kadang tani sakmenika kapetang inggil ngancik 10 ewu rupiyah saben kilonipun. Kamangka ing mangsa panen sakderengipun piyambakipun namung saget nyade ing regi 5 ewu rupiyah kemawon saben kilonipun. Kajawi pengaosipun inggil, panyuwunan kacang panjang ing pekenan ugi mindhak kabandi9ngaken dinten padatan. Saben dintenipun piyambakipun saget nyade engga dasanan kilo kacang panjang dumateng para bakul lan pengepul ingkang wonten ing laladan gunungkidul kadasta ing laladan gedangsari, nglipar lan pathuk. Inggilipun regi kacang panjang menika dipun dugi awit pasudiyan ing pekenan ingkang winates, awit katahipun laladan ingkang mboten saget panen amargi kapangaribawa cuara ekstrim lan bena.
Kajawi kacang panjang, sawetawis komoditas janganan pengaosipun ugi inggil, kadasta timun, gambas, engga buncis.
