TVRI YOGYAKARTA NEWS – HENDRI-ROCHIM
Pekenan urang vaname saking laladan pesisir Kulonprogo dumugi wedal samenika tasih sae lan tinarbuka, nanging emanipun mboten sedaya kadang tani menapa dene pamisaya mekaten saged mbudidaya komoditas menika jalaran mbetahaken pawitan ingkang ageng.
Panyuwunan urang vaname, sae menika ing laladan ngayogjakarta menapadene laladan sanes kanyata ugi mboten nate sepen. Mboten namung menika, kathahipun panyuwunan kanyata ugi dereng saged dipun cekapi sedayanipun. Agus salah saweneh kadang tani pamisaya urang vaname saking Kulonprogo waleh, pancen mboten gampil nyekapi sedaya panyuwunan peken jalaran gunggung tambak ingkang wonten, ugi mboten saged kathah, semanten ugi perkawis hawa lan ewah-ewahan cuaca ingkang asring damel panen urang vaname menika nemahi pepalang. Langkung tandes malih agus waleh, sak jatosipun ngrimat urang vanem menika mboten njlimet kados ingkang dipun bayangaken tiyang, nanging ingkang wigati, kadang tani pamisaya urang kedah greteh niti priksa kawontenan tambak lan urang saben dinten, kalebet niti priksa kawontenan toyanipun, sirkulasi, pakan sarta ama sesakit. Agus ingkang sampun gadah pengalaman kathah minangka kadang pamisaya uran vaname ugi suka katrangan, panen urang ing ubengan wedal samenika kanyata ugi langkung sae kapandingaken kaliyan tahun kapengker. Ukuranipun ugi langkung ageng jalaran kapangaribawan kaliyan kawontenan hawa ingkang radi sae. Kanti regi setunggal kilo wolung dasa nan ewu rupiah kanti ukuran tigang dasa nem, agus sage panen dasanan kwintal urang vaname. Urang–urang menika sak lajengipun ugi bade dipun distribusi-aken ing sawetawis papan kalebet lampung sarta manca negari. Nanging wonten setungal perkawis ingkang dados gorehipun agus sesarengan kaliyan para kadang tani pamisaya ulam sanesipun, inggih menika nalika mangke bandara enggal sampun purna, piyambakipun ugi sampun mboten saged nambak malih jalaran lahanipun sampun dipun ginaaken kangge kange kabetahan aviasi utawi penerbangan.
