TVRI YOGYAKARTA NEWS – SETYA BUDI
Mlebet ing mangsa rendheng menika, kadang tani ing laladan Kabupaten Gunungkidul wiwit nanem pantun ing lahan pesabinanipun. Kangge asil ingkang maksimal katah saking kadang tani ingkang nanem pantun varietas unggul.
Katahipun pasudiyan toya irigasi ing mangsa tanem sakmenika, ndamel kadang tani langkung gampil anggenipun milih winih pantun ingkang badhe dipun tanem ing pesabinanipun. Kadang tani katah ingkang sami nanem pantun varietas unggul kadasta jinis supadi, mapan, ciherang engga mapan. Ladiyo salah saweneh kadang tani ing laladan Karangsari Wonosari Gunungkidul ngandaraken, bilih mangsa tanem sakmenika kawontenanipun langkung sae kabandingaken mangsa tanem sakderengipun. Pasudiyan toya irigasi ingkang tansah kacekapan awit sampun mlebet ing mangsa rendeng, dipun ajab tuwuhipun taneman pantun ingkang dipun tanem kadang tanji saget tuwuh langkung sae kabandingaken mangsa tanem sakderengipun. Kawuningana bilih ing mangsa sakderengipun taneman pantun ingkang dipun tanem kadang tani tuwuhipun kirangs ae awit winatesing pasudiyan toya irigasi. Ing mangsa tanem sakmenika piyambakipun milih nanem pantun jinis supadi. Kapilihipun varietas menika amargi dipun pitados produktifitasipun ingkang inggil lan kualitas berasipun premium. Kajawi menika pantun jinis supadi tuwuhipun subur lan tahan saking manekawrni ngrebasaning ama lan sesakit. Ing umur setunggal wulan, taneman pantun jinis supadi menika ketingal subur, rumpun tunasipun ugi tuwuh kanthi sae. Ing mangsa panen samangke, taneman pantun ingkang dipun tanem ladiya dipun dugi saget ngasilaken engga 20 sak gabah. Piyambakipun ngajab pengaosing gabah ing mangsa panen samangke sae, saengga saget ndadosaken bebathenipun kadang tani lan nutup beya pangrimatan.
