TVRI YOGYAKARTA NEWS – SETYA BUDI
Ing mangsa rendeng kados wekdal sakmenika kadang tani kewetan anggenipun mepe gabah asil panenipun. Saengga kangge garingaken gabah ing mangsa rendeng menika, kadang tani ing Kabupaten Gunungkidul ginakaken bed dryer utawi mesih kangge garingaken gabah.
Bed dryer mujudaken piranti awujud mesin ingkang mupangatipun kangge garingaken asil olah tetanenipun kadang tani mliginipun kangge jinis gabah. Salah saweneh klempakan ingkang sampun mupangataken piranti kasebat, inggih menika gapoktan sahabat saking laladan Umbulrejo Kapanewon Ponjong Kabupaten Gunungkidul. Sampun wiwit setunggal tahun pungkasan menika gapoktan sahabat mupangataken bed dryer kangge garingaken gabah gadahanipun kadang tani. Menapa malih menawi mlebet ing mangsa rendheng, piranti menika saget dados solusi menggahing kadang tani kangge garingaken gabahipun. Cara ginakaken piranti menika ugi namung gampil, gabah asil panenipun kadang tani dipun lebetaken bak ageng sinambi dipun aduk mawi mesin. Sawetawis kangge mbenteraken gabah menika migunakaken sekam utawi kayu bakar. Suhu benter ingkang dipun asilaken saking sekam lan kayu bakar menika saklajengipun dipun arahaken ing sak ngandhaping bak. Petugas kanthi ajeg niti priksa kadar toya ing gabah. Lumantar piranti bed dryer saben dintenipun gapoktan sahabat menika saget garingaken gabah engga 3 ton. Kajawi kangge garingaken gabah, bed dryer menika ugi saget kangge garingaken asil panen kacang lan jagungipun kadang tani ing laladan Umbulrejo Kapanewon Ponjong Kabupaten Gunungkidul.
