TVRI YOGYAKARTA NEWS – ADI NUGROHO-WENDY
Kates varietas unggul California dumugi wedal samenika tasih mujudaken komoditas pinujul. Nanging emanipun nanem kates jinis unggulan mekaten kalebet angel angel gampil jalaran asring kedah ngajengi sesakit jamur lan virus, mliginipun ing mangsa jawah.
Kejawi pisang, melon lan semangka, kates unggulan jinis California mujudaken woh-wohan ingkang kathah dipun padosi tiyang. Pak kancil, saweneh kadang tani ing lahan gesik bantul ingkang sampun sawetawis wedal budidaya kates california ngandaraken, saking siti wiyar tigang ewunan meter pesagi piyambakipun saged panen kwintalan woh kates saben tigang dinten sepisan. Kepara piyambakipun kuwalahan sanged nyekapi kabetahan peken mligi kangge laladan DIY kemawon. Sinaosa mekaten, kanyata tasih sekedhik kadang tani ingkang purun nanem kates California jalaran kates mujudaken setunggaling taneman ingkang radi rewel. Saya malih menawi ingkang sampun kenging jamur lan virus, tundhanipun ugi damel taneman kates pejah sak wanci wanci. Miannagka taneman unggulan ingkang ngasilaken, kates California menik ugi gadah manawerni kelangkungan, kejawi raosipun manis, kates ingkang ukuranipun namung alit menika ugi langkung kathah ngandet vitamin C lan kanti oksidan. Nanem kates California menika ugi namung gampil kemawon nanging ingkang kedah dipun wiogatsoaken mboten sanes wontenipun ama ingkang ngrebasa tyaneman kates, mliginipun ingmangsa rendeng. Salah setunggalipun inggih menika jamur, parasit sarta sesakit ing perangan oyot. Taneman ingkang katrajang sesakit lan ama tuwuhipun mboten subur lan wohipun ugi namung sekedhik.
Kawontenan hawa sarta ewah-ewahan cuaca saking benter tumuju asrep limrahipun damel bakteri patogen wau gampil ngrembaka ing salebeting siti, mila ama sesakit ugi lajeng gampil ngrebasa taneman kates. Mila kadang tani kedah greteh anggenipun ngawekani wontenipun virus, jamur lan bakteri ingkang dados mengsahipun taneman kates. Menawi badhe ngginaken rabuk organik saking bucalan lembu menapa dene mendha kedah ingkang sampun dados jalaran asring rabuk organik ingkang kirang sampurna malah dados media tuwuhipun uret ingkang badhe ngrebasa oyot wit kates California.
