TVRI YOGYAKARTA NEWS – WIDI-YUDHA
Para pamirsa, saweneh warga saking Prambanan Klaten Jawa Tengah nindaken budidaya nanas ing pot. Lumantar cara menika lahan ingkang bera mboten dados perkawis.
Lahan ingkang bera, mboten dados perkawis tumprapipun Isto Suwarno saking Pamukti Baru, Prambanan, Klaten. Supados samangkenipun lahan ingkang bera kala wau saged produktif, piyambakipun mekaraken setunggaling inovasi olah tenanen ing setunggaling wadah winates. Wekdal sakmenika piyambakipun nembe nyobi nanem taneman nanas ing setunggaling pot utawi tabulampot tanamen nanas. Kapilihipun taneman menika, jalaran nanas mujudaken setunggaling woh ingkang gadhah mupangat ageng kalebet ing donyaning kasarasan, lan pekenanipun tasih tinarbuka. Taneman nanas menika saged dipun tanem saking saker utawi anakanipun menapadene saking crown utawi jambulipun who nanas. Caranipun nanem inggih mboten sisah saker utawi crownipun cekap katanem ing salebeting siti ingkang saderengipun dipun campur kaliyan rabuk kandhang. Salebeting nanem winih udakawis namung gangsal sentimeter kemawon ingkang kaceblokaken ing siti. Wit nanas menika saged dipun panen setunggal tahun saampunipun katanem. Isto Suwarno gadhah kekajengan, lahan-lahan ingkang bera lan kathah selanipun, saged dipun mupangatken kangge budidaya taneman nanas ing wadah ingkang winates utawi pot. Isto Suwarno ugi nambahaken bilih budidaya nanas menika gadhah pangajeng–ajeng ingkang sae, jalaran kajawi minagka who seger, ugi saged dipun damel selai menapadene sirup nanas.
