TVRI YOGYAKARTA NEWS-SETYA BUDI
Winatesing pasudiyan toya ndamel kadang tani pantun ing laladan pesisir Sadeng Girisubo Gunungkidul nemahi gagal panen. Kawontenan menika ndamel kadang tani nemahi kapitunan ngancik yutanan rupiyah.
Jawah ingkang sampun langka dumados ing laladan pesisir sadeng, mangaribawani taneman pantunipun kadang tani mboten saget tuwuh kanthi sae. Kados ingkang dumados ing lahan olah tetanen taneman pantun ing laladan dusun bengle kalurahan pucung menika. Awit saking winatesing toya irigasi, ndamel taneman pantun ingkang dipun tanem kadang tani mboten saget tuwuh maksimal, kepara katah ingkang sami pejah. Babmenika temtunipun ndamel kadang tani nemahi kapitunan. Karsino salah saweneh kadang tani waleh, mlebet ing purwakaning mangsa tanem kala wingi jawah tasih asring dumados ing papan menika saengga katah kadang tani ingkang milih nanem pantun mligi kangge jinis segreng. Ananging sak sampunipun kalih wulan, jawah mboten mandap malih saengga ndamel lahan pesabinanipun kadang tani garing. Taneman pantun jinis segreng ingkang kawentar tahan saking cuaca benter menika mboten kiyat ngadepi kawontenan kasebat. Wusananipun katah taneman pantunipunkadang tani ingkang lajeng pejah. Menapa malih ama wereng ingkang ngrebasa taneman pantun saya ndamel kadang tani nemahi kapitunan langkung katah. Ing mangsa tanem menika karsino kedah nemahi kapitunan engga yutanan rupiyah. Amargi lahan ingkang padatanipun saget ngasilaken 20 sak gabah, sakemnika namung saget ngasilaken 7 sak gabah kemawon.
Awit saking kawontenan menika kadang tani namung saget pasrah lan ngajab jawah enggal mandhap malih ing laladan menika, saengga lahan pesabinanipun kadang tani saget dipun olah malih mliginipun kangge nanem palawija kadasta jagung lan kacang brol.
