TVRI YOGYAKARTA NEWS-HENDRY SAPUTRA-ABDUL ROHIM
Para pamirsa ewah – ewahaning mangsa mujudaken setunggaling perangan ingkang kedah dipun waspadani dening kadang tani amargi saged nuwuhaken sesakit ingkang saged ngenjlogaken asil panen.
Ing wekdal sakmenika kadang tani ugi sampun nggadahi etangan piyambak kangge nemtoaken taneman menapa ingkang badhe dipun budidaya. Bab wau temtu dipun jumbuhaken kaliyan mangsa lan sipatipun taneman. Salash etunggaling taneman ingkang ringkih sanget dateng mangsa inggih menika lombok. Wonten manekawerni sesakit ingkang nerak taneman lombok salah setunggalipun inggih menika virus jene. Caranipun nularaken dhateng taneman sanesipun inggih menika kutu kebul ingkang sampun katerak virus salajengipun menclok ing wit ingkang tasih saras jalaran sampun kencokan kewan kutu kebul ingkang mbeta virus salajengipun wit wau saged ketularan virus jene. Taneman ingkang katrajang virus jene dipun pertandani wernining ron dados jene sarta kriting. Menawi mboten enggal-enggal dipun kendhalenei saged ngenjlogaken asiling olah tetanen mliginiun lombok ngantos wolung dasa persen. Salah setunggalipun cara kangge ngawekani virus menika inggih lumantar tanerman perangkap sae menika saking wit kacang panjang, jagung menapadene taneman sanesipun. Kanthi wontenipun taneman perangkap wau kutu kebul mboten menclok ing taneman lombok anangig menclok ing taneman perangkap. Kajawi nanem taneman perangkap kadang tani ugi kedah nggulawenthah winih taneman ingkang badhe dipun tanem wiwit ing pandheheran. Menawi wonten setunggaling wit lombok ingkang katrajang virus, enggal–enggal dipun bedhol salajengipun dipun besem, supados mboten nulari taneman sanesipun. Kajawi menika njagi karesikaning lingkungan lahan ugi kedah katindaaken supados saged ngirangi saya sumebaripun sesakit menika.
