TVRI YOGYAKARTA NEWS – HENDRY SAPUTRA – ABDUL ROHIM
Setunggaling taneman ingkang kebak mupangat lan asring dipun dadosaken minangka taneman pager wonten ing lahan pesabinan inggih menika taneman kelor.
Taneman kelor mujudaken satunggaling tetuwuhan saking ingkang inggilipun saged ngantos sewelas meter. Ronipun bunder alit, saged dipun mangsak dados janganan menapadene kangge jampi. Perangan taneman kelor inggih menika ron, uwit, woh lan wijinipun nggadahi sakelangkung mupangati menggahing badan. Kelor ngandhut nutrisi ingkang dipun betahaken dening badan, ing antawisipun asam amino, vitamin, kalium, protein lan zat besi. Kajawi dipun dhahar nalika tasih teles, kelor ugi saged dipun garingaken, kadadosaken glepung. Manut panaliten, kandhutan kelor teles lan garing menika beda-beda. Kelor teles ngandhut vitamin C lipet kaping pitu kapandhinagken jeram, vitamin A lipet kaping sekawan kapandhingaken wortel, lan kalium lipet kaping tiga saking pisang. Awit saking mupangatipun taneman kelor wau mila mboten maibenbilih taneman kelor kalebet taneman superfood. Taneman kelor sakmenika sampun kathah dipun budidaya dening masyarakat kalebet wonten ing pesabinan. Ing lahan pesabinan kadang tani kathahingkang nanem wontening tegalan ngiras pantes mupangataken lahan kosong. Nalika dipun taneman ing tegalan temtu mboten mbetahaken pangrimatan ingkang mligi, amargi anggenipun ngrimat temtu sesarengan jaliyan nalika ngrimat taneman utami. Taneman kelor ingkang dipun tanem wonten ing lahan menika kanyata ugi ketingal subur.
