TVRI YOGYAKARTA NEWS – ADI NUGROHO– WENDY WICAKSONO
Saking sak kathahing jinis hortikultura ingkang wonten, jeram peres manis mekaten mujudaken setunggaling taneman ingkang kapetang ngasilaken sanget. Setunggal taneman jeram peres menika saged ngasilaken woh wolu dumugi sedasa kilo.
Nanem jeram peres ing pekawisan griya mekaten menawi dipun rimat kanti saestu ugi saged ngasilaken. Jeram peres, prasasat saben dinten dipun betahaken dening wande–wande dahar kangge bahan dame unjukan. Setunggal kilo jeram peres saged pajeng wolung ewu dumugi kalih welas ewu rupiah, gumantung kaliyan bobot saenipun lan ukuranipun. Kalodangan peken jeram peres dumugi wedal samneika ugi tasih kapetang sae. Sawetawis dereng kathah kadang tani menapa dene bale griya ingkang purun mbudidaya jeram peres kamangka asilipun kanyata ugi mboten kawon kaliyan nalika nanem komoditas hortikultura sanesipun. Menawi dipun tingali kanti permati, nanem jeram peres mekaten ugi mboten njlimet sarta mboten mbetahaken pangrimatan ingkang mirunggan. Nanging ingkang kedah dipun emut-emut sadarengipun nanem, inggih menika perkawis milih winih jeram peres. Langkung sae kedah dipun pilih winih saking asil cangkokan menapa dene okulasi. Menawi winih menika asalipun saking tukulan wiji, saged dipun pestekaen asilipun mangke ugi jeram peres ingkang raosipun kecut sanget. Taneman jeram saben dinten kedah dipun siram toya nanging sampun ngantos megung. dipun rabuk kandang lan npk setunggal wulan sepisan. Panen langkung sae dipun tindhaken ing wanci dalu. Sawetawis babagan ama sesakit ingkang paling kathah ngrabasa inggih menika kutu kebul pethak, kutu cemeng sarta pathek jeram. Ama sesakit menika saged dipun awekani kanti ngginaken pestisida alami. Saged kawuningan, jeram peres menika sinaosa dipun tanem ing dataran rendah lan hawanipun benter kanyata ugi tasih saged ngasilaken woh ingkang kathah lan manis.
