TVRI YOGYAKARTA NEWS – WIDI – HARIF YUDA
Kajawi minangka srana kangge ngoncori lahan olah tetanen, waduk sermo ingkang dumunung ing kokap kulonprogo saged dipun dadosaken setunggaling jujugan wisata, kangge ngenggar-enggar penggalih.
Waduk sermo dumunung ing Dusun Sermo, Desa Hargo Wilis Kecamatan Kokap Kabupaten Kulonprogo utawi tigang dasa gangsal kilometer saking kitha ngayogyakarta. Waduk serma menika dipun-bangun rikala tahun sewu sangang atus sangang dasa sekawan. Ancas kabangunipun waduk inggih menika kangge ngoncori lahan ingkang dumunung ing laladan menika ingkang ngancik pitung ewu satus seket kalih hektar. Kajawi kangge kabetahan irigasi toya bendungan ugi dipun-ginaken kangge toya baken Kabupaten Kulonprogo ingkang agengipun satus seket liter saben second. Wiyaring waduk ingkang ngancik setunggal koma seket pitu kilometer pesagi menika saged ngemot toya selangkung yuta meter kibik. Kajawi kagge irigasi lan kabetahan toya resik jumbuh kaliyan gilir gumantosing wekdal waduk menika ugi dipun mupangataken minangka kangge ngingah ulam, sarta kangge jujugan wisata. Dhumateng para pelancong ingkang ngendhangi ing waduk lan ngenggar-enggar penggalih ing satengahing waduk dipun sudiyaaken sawetawis gethek menapadene perahu. Ngendhangi waduk sermo sinambi ningali kawontenaning alam ingkang endah lan edi peni,lan pareden ingkang ngupengi waduk, temtu kemawon saged kangge nglelipur manah sasampunipun makarya. Mlebet ing jujugan wisata menika ugi namung mirah, saben tiyang namung gansgal ewu rupiyah kemawon. Sawetawis menawi para pelancong ingkang ngersaaken dhahar, ugi wonten sawetawis wande ingkang nyudiaaken dhaharan ingkang ngginaken bahan baken ulam. Sakpurnanipun ngendhangi waduk sermo menika, para pelancong saged nglajengaken lampah tumuju jujugan wisata sanesipun ing laladan Kokap Kulonprogo.
