TVRI YOGYAKARTA NEWS – WIDI – HARIF YUDA
Asiling kerajinan sengkeran peksi saking Dusun Jaten, Argosari Bantul, gadhah bobot ingkang sae, saengga mboten maiben sampun sumebar ing saindenging nuswantara.
Klangenan’ peksi perkutut ing kalanganing masyarakat jawi,sampun kaloka wiwit jaman kawuri. Peksi perkutut mboten namung dados setunggaling karemenan utawi hobi, dedagangan utawi bisnis kepara ugi dados pralambanging status sosial. Salah setunggaling perangan ingkang wigati ing saklebeting ngingah klangenan peski perkutut inggih menika wontenipun sengkeran. Sengkeran ingkang dipun betahaken ing saklebeting ngingah peksi perkutut ugi sengkeran ingkang mirunggan lan gadhah cakrik mirunggan jumbuh kaliyan prlambang sosial kala wau. Salah setunggaling laladan ing DIY, ingklang saperangan warganipun nindaken usaha ndamel kerajinan sengkeran perkutut inggih menika ing Dusun Jaten, Argosari, Sedayu Bantul. Ing padusuanan menika wonten gangsal welasan tiyang ingkang nggegulang ing donyaning kerajinan sengkeran. usaha menika sampun katindaken run tumurun saking para tiyang sepuhipun. Salah setunggalipuningih menika sumar, ingkang sampun makarya ndamel sengkeran wiwit tahun kalih ewu gansgal kapengker. Dipun biyantu semahipun, sumar saben wulanipun saged ndamel sengkeran engga kawan dasanan iji. Ing saklebeting ndamel sengkeran menika dipun betahaken kaprigelan ingkang mirunggan sarta dipun betahaken raos ingkang sabar lan tlaton ing saklebeting ngayahi pakaryanipun. Bahan sengkeran saking deling utwi ingkang sinebat ruji, menika dipun tumbas saking pengrajin sanes. Saklajengipun perangan sanes dipun damel piyambak. Sasampunipun dipun rakit lan dipun cet, sengkeran ingkang sampun dados menika sakaljengipun dipun setoraken dhumateng juragan. Saben ijinipun dipun kerta aji kalih atusan ewu dumugi yutanan rupiyah gumantung kaliyan cakrik lan jejangkeping. Produksi sengkeran saking dusun jaten menika sampun sumebar ing saindening nuswantara.
