TVRI YOGYAKARTA NEWS – ADI NUGROHO-WENDY
Asilipun olah tetanen kejawi gumantung kaliyan cara ngrimat kanyata ugi gumantung sanget kaliyan lantip anggenipun milih varietas unggulan, salah setunggalipun tomat dartaran rendah varietas ratna.
Among tani ing lahan gesik bantul mbok bilih pancen kalebet kadang tani ingkang kreatif mupangataken kawontenan mangsa tanem kanti cara milih varietas ingkang saged dipun dadosaken piyamdel. Meh sedaya kadang tani ing laladan menika ing mangsa panen brambet, kathah ingkang sami nanem tomat ing pinggiring lahan. Kathah among tani ingkang langkung milih taneman tomat kanti cara organik jalaran asilipun maremaken. Taneman tomat ingkang dipun rimat kanyata ugi saged mawoh sae, sinaosa namung dipun dadosaken subal galengan kemawon. Kawontenan taneman ugi sae prasasat mboten kenging ama menapa-menapa, bedha tebih kapandingaken kaliyan lombok ingkang kedah ngajengi ama pathek menapa dene melon ingkang saweg katrajang jamur upas. Dipun pilihipun tomat varietas ratna dening among tani jalaran jinis taneman menika kapetang produktif sanget, mboten namung menika regi tomat ugi kapetang ajeg. Sampun sawetawis minggu menika, regi tomat saking papan menika dipun aosi kawan ewu rupiah saben kilonipun. Nanging ingkang kedah dipun gatosaken, ama ingkang asring nerak taneman tomat mboten sanes jamur sarta bakteri. Menawi sampun kenging, among tani ugi enggal-enggal ngusadani kanti ngginaken pestisida alami, nanging menawi sampun kasep lan mboten saged dipun awekani, kadang tani enggal–engal mbedol taneman tomatipun lan dipun besem supados mboten nular ing taneman sanesipun. Olah tetanen kanti cara organik menika kanyata asilipun ugi langkung sae. Perkawis ama menapadene sesakit taneman ugi awis–awis dumados jalaran ngrimat kanti cara organik mekaten ugi damel asil panen langlung awet lan mboten gampil bosok.
